Архетыповыя вобразы і першапаняцці ў міфалагічнай карціне свету Таццяны Шамякінай

Abstract

Прадметам аналізу з’яўляецца ўклад Т. Шамякінай у развіццё беларускага міфалагазнаўства як аднаго з перспектыўных напрамкаў літаратуразнаўчых і культуразнаўчых даследаванняў. Навуковыя пошукі Т. Шамякінай сканцэнтраваны ў асноўным на сумежжы літаратуразнаўства, культуралогіі і міфалогіі і, такім чынам, маюць інтэрдысцыплінарны характар. У яе манаграфіі «Беларуская класічная літаратура і міфалогія» (2001) сувязі міфалогіі і літаратуры даследуюцца шматбакова і аналітычна, з выкарыстаннем багатага фактаграфічнага матэрыялу. Галоўная мэта даследчыцы – паказаць, як міфалагемы, сімвалы і архетыпы, якія былі ўласцівы калектыўнай свядомасці на працягу многіх стагоддзяў, мадыфіцыруюцца і аказваюць уплыў на літаратурную творчасць розных гістарычных эпох. Т. Шамякіна вылучае асобна беларускую літаратурную класіку, на якую, па яе меркаванні, міфалогія зрабіла найбольш прыкметнае ўздзеянне. У яе працах паэтыка Я. Купалы, Я. Коласа, М. Гарэцкага, М. Багдановіча і іншых аўтараў разглядаецца ў сувязі з міфапаэтычным светабачаннем і выяўленнем духоўнага вопыту, назапашанага папярэднімі пакаленнямі