Дынаміка ў моўным афармленні беларускіх рэкламных тэкстаў пачатку ХХ ст.

Abstract

Мова беларускай рэкламы, як і любая моўная з’ява ці лексічная група, прайшла пэўныя этапы свайго станаўлення і развіцця. Пачатак працэсу прыпадае на перыяд пачатку ХХ ст., які лічыцца асноватворчым у гісторыі новай беларускай літаратурнай мовы. У артыкуле мы паспрабавалі прасачыць тагачасныя моўныя асаблівасці ў вобласці рэкламы, у прыватнасці выявіць стабільныя і дынамічныя з’явы, а таксама эвалюцыйныя тэндэнцыі ў моўным афармленні рэкламных паведамленняў і аб’яў. Факталагічнай крыніцай даследавання паслужыла аўтарытэтнае беларускамоўнае перыядычнае выданне – газета «Наша Ніва» (1906–1915 гг.), на старонках якой ад самых першых нумароў пачалі з’яўляцца разнастайныя аб’явы і абвесткі рэкламна-інфармацыйнага зместу. У беларускім мовазнаўстве вывучэнне прынцыпаў стварэння рэкламных тэкстаў у гістарычным аспекце – цалкам наватарскі даследчы кірунак. Атрыманне дакладнага ўяўлення аб нацыянальных традыцыях моўнага афармлення рэкламных матэрыялаў можа стацца важным укладам у распрацоўку навукова-тэарэтычных асноў беларускага капірайтынгу. У практычным сэнсе ў наш час, калі беларускамоўная рэклама становіцца прыкметнай з’явай на маркетынгавым полі Беларусі, вывучэнне і прымяненне гістарычнага вопыту пры напісанні рэкламных тэкстаў будзе спрыяць стварэнню эфектыўных нацыянальных рэкламных мадэляў і стратэгій. Гэта ў сваю чаргу можа садзейнічаць павелічэнню беларускамоўнага сектара ў рэкламе і ўзмацненню прэстыжу беларускай мовы за кошт рэкламнай публічнасці