Узроўні валодання беларускай мовай як замежнай: структура апісання і спосабы вымярэння

Abstract

Праектаванне сістэмы ўзроўняў валодання беларускай мовай як замежнай грунтуецца на ўвазе да вынікаў навучання, пад якімі разумеецца пэўны ўзровень камунікатыўнай кампетэнцыі навучэнцаў і тэставыя спосабы яе вымярэння. Распрацоўка метадычнай канцэпцыі апісання структуры беларускамоўнай камунікатыўнай кампетэнцыі, суадноснай з еўрапейскім стандартам, адносіцца да ліку актуальных задач дыдактыкі беларускай мовы як замежнай. У артыкуле прапанаваны аналіз арганізацыйнай схемы апісання параметраў кампетэнцыі як аб’ектаў тэставага кантролю і крытэрыяў яе ацэнкі, распрацаванай дзеля патрэб сертыфікацыі ўзроўняў валодання беларускай мовай як замежнай. Даследаванне мае на мэце паказаць, што апісанне беларускамоўнай камунікатыўнай кампетэнцыі суадносіцца з катэгорыямі еўрапейскай сістэмы стандартаў у галіне вывучэння сучасных моў. Артыкул падрыхтаваны ў рамках навуковага даследавання «Распрацоўка адукацыйных стандартаў і тыпавых тэстаў па беларускай і рускай мовах як замежных», якое выконваецца ў межах Дзяржаўнай праграмы навуковых даследаванняў (на 2016–2020гг.) «Эканоміка і гуманітарнае развіццё беларускага грамадства»