Дынастычныя і палітычныя эліты ў Беларусі. № УД-7723/вуч.

Abstract

Працэс станаўлення дзяржаўнасці абумовіў фарміраванне ў грамадстве адносна невялікай групы асоб, якія мелі высокі сацыяльны статус, аўтарытэт і так ці інакш бралі ўдзел у вызначэнні дзяржаўнай палітыкі, разам з манархам непасрэдна ўплывалі на прыняцце важнейшых рашэнняў. Менавіта такую групу асоб і прынята называць элітай. Паўставалі і развіваліся дынастыі, якія аказвалі вызначальны ўплыў на эканамічную і культурную складаючую грамадства. Варта таксама памятаць, што дзяржавы Сярэднявечча і Новага часу складаліся з розных гістарычных рэгіёнаў, якія мелі асаблівасці сацыяльна-палітычнага жыцця і ўласную эліту. Такія рэгіянальныя і лакальныя эліты валодалі рэальнай уладай і аўтарытэтам у сваіх мясцовасцях, актыўна ўдзельнічалі ў сацыяльна-эканамічным, палітычным і культурным жыцці, уплывалі на прыняцце рашэнняў на мясцовым і дзяржаўным узроўнях. Акрамя таго, лакальныя эліты выконвалі важную функцыю трансляцыі патрэб і інтарэсаў мясцовага насельніцтва да вышэйшых кіроўных колаў дзяржавы. Назапашаны сусветнай гістарычнай навукай вопыт у распрацоўцы гісторыі дынастый і тэорыі эліт, пашырэнне базы крыніц дае магчымасць прымяняць сучасныя тэарэтычныя напрацоўкі для вывучэння аналагічных працэсаў у гісторыі Усходняй Еўропы Паглыбленае даследаванне эліт дае магчымасць вывучаць працэсы прыняцця рашэнняў на розных узроўнях, эвалюцыю палітычнай сістэмы дзяржавы, адметнасці сацыяльнага, этнічнага і канфесійнага складу насельніцтва, а значыць усебакова пазнаваць айчынную гісторыю. Такім чынам, выкладанне на другой ступені атрымання вышэйшай адукацыі вучэбнай дысцыпліны «Дынастычныя і палітычныя эліты ў Беларусі» будзе садзейнічаць пашырэнню ведаў па гісторыі Беларусі будучых выпускнікоў магістратуры спецыяльнасці «Гісторыя», а таксама садзейнічаць іх далейшаму прафесійнаму росту.