Невербальная камунікацыя ў міжкультурных зносінах

Abstract

Адным з набыткаў сучаснай грамадскай свядомасці з’яўляецца тое, што нельга ўявіць ні адну цывілізаваную краіну па-за сувяззю са светам, з іншымі культурамі. Неабходнасць народаў у культурным узаемаразуменні, імкненне спазнаць духоўны свет адзін аднаго вядзе да пашырэння духоўных сувязяў і кантактаў, якія набываюць сістэматычны характар. Ідэі захавання і далейшага развіцця чалавечай цывілізацыі ўсё больш глыбока звязваюцца з неабходнасцю культурных зносін. Няма народа, які б спазнаў усе ісціны, няма народа, які б дасягнуў дасканаласці ва ўсіх сферах культуры і маралі. Толькі разам ствараецца цывілізацыя. Кожны народ з’яўляецца носьбітам не толькі нацыянальнай, але і агульначалавечай культуры. І спецыялісты ў галіне сродкаў масавай камунікацыі, выкарыстоўваючы свой сапраўды агромністы ўплыў, здольныя садзейнічаць фарміраванню новай пазітыўнай гуманістычнай культуры. У сістэме вучэбных дысцыплін, абавязковых для падрыхтоўкі журналіста вышэйшай (універсітэцкай) кваліфікацыі, такое праблемнае поле, як невербальная камунікацыя ў міжкультурных зносінах, з’яўляецца прыярытэтным для паглыбленага вывучэння.