Беларускія і ведыйскія замовы: структура, вобразнасць, семантыка : справаздача аб навукова-даследчай рабоце (заключная) / БДУ; навуковы кіраўнік Дзянісенка В.С.

Abstract

Аб’ектам даследавання з’яўляюцца беларускія і ведыйскія замовы. Мэта даследавання – зрабіць агляд індаеўрапеістычных даследаванняў у гуманітарных дысцыплінах, распрацаваць навуковую методыку параўнання беларускіх і ведыйскіх замоў з улікам спецыфікі структуры і функцый асноўных матываў (субматываў, мікраматываў) беларускіх і ведыйскіх замоў. Упершыню ў айчыннай фалькларыстыцы зроблены агляд прац, прысвечаных даследаванню беларуска-індаеўрапейскіх паралеляў і сувязей. Між тым складанасць тэмы абумоўлена недастатковай распрацаванасцю падыходаў да акрэсленай праблематыкі, пра што сведчаць адзінкавыя грунтоўныя артыкулы па беларускай індаеўрапеістыцы, адсутнасць перакладаў і аўтарытэтных айчынных спецыялістаў па санскрыту, апісальнасць шэрагу прац. Аднак пошук агульных індаеўрапейскіх элементаў і паралеляў з’яўляецца шматаспектнай праблемай. Адсюль вынікае немалаважная выснова, што фальклор можа быць прыдатным для выяўлення разнастайных рэканструкцый (узнаўленне жанраў, абрадавай структуры, матываў і інш.), а развіццё беларускай фальклорнай індаеўрапеістыкі можа быць прыдатным для вызначэння індаеўрапейскіх вытокаў беларускага фальклору і вырашэння праблемы суадносін этнічнага і міжэтнічнага. Вынікам даследавання стала выпрацоўка вельмі важнай для фалькларыстыкі ў цэлым і для параўнальнага вывучэння замоў, у прыватнасці, праблемы: метасхемы жанру – тэкстапараджальны і сюжэтапараджальны патэнцыял пачатковага матыву – тэкст – культурны кантэкст і яго роля ў семантычным напаўненні.