Рынак і рыначныя адносіны ў Беларусі: гісторыя і сучаснасць. № УД-6420/вуч.

Abstract

Для Беларусі, якая не так даўно ўступіла на шлях пабудовы суверэннай, незалежнай дзяржавы, вывучэнне, часам вяртанне, уласнай гісторыі мае значэнне не толькі таму, што гістарычная спадчына з’яўляецца падмуркам для аднаўлення нацыянальнай свядомасці народу, але і таму, што намаганні па развіцці дзяржаўнасці, рэфармаванні сацыяльных і эканамічных адносін могуць быць паспяховымі толькі, калі яны заснаваны на разуменні заканамернасцей мінуўшчыны. Асаблівую цікавасць у гістарычным мінулым выклікаюць тыя працэсы і з’явы, якія прыводзілі да сутнасных пераўтварэнняў у грамадстве. Да іх, безумоўна, адносіцца і працэс станаўленне і развіцця рынку і рыначных адносін, які пачаўся ва ўмовах адсутнасці ў беларусаў нацыянальнай дзяржаўнасці і атрымаў працяг пасля набыцця нашай краінай незалежнасці. Дадзенае пытанне мае вялікую ступень актуальнасці і важнасці на сучасным этапе развіцця беларускага грамадства, калі наша дзяржава актыўна ўцягнута ў працэс сусветнай эканамічнай інтэграцыі пры захаванні нацыянальных прыярытэтаў у эканоміцы. Вывучэнне і ўлік гістарычнага вопыту развіцця эканамічных сувязяў можа дазволіць Рэспубліцы Беларусь знаходзіць новыя магчымасці ў рэалізацыі знешнеэканамічных задач і адстойванні нацыянальных інтарэсаў.