Мова і стыль інтэрнэт-выданняў № УД-S-143/р.

Abstract

Інтэрнэт становіцца універсальным і дамінуючым сродкам у міжмоўнай камунікацыі, і разам з тым з’яўляецца найважнейшым інструментам узаемнага ўплыву моў адна на адну на ўсіх моўных узроўнях. Для тэкстаў, якія функцыянуюць у інтэрнэце, характэрныя такія прыкметы, як, па-першае, глабалізацыя, г. зн. яны распаўсюджваюцца фактычна ва ўсім свеце; па-другое, шырокае выкарыстанне магчымасцей мультымедыя, г. зн. тэкст можа аб’ядноўвацца з выявай і вобразам; па-трэцяе, інтэрактыўнасць, г. зн., у адрозненне ад традыцыйных масмедыя, для інтэрнэта характэрна актыўная двухбаковая сувязь паміж камунікатарам і рэцыпіентам, які сам у любы момант становіцца камунікатарам. Інтэрнэт з’яўляецца надзвычай прывабным сродкам камунікацыі, і гэтым тлумачыцца яго беспрэцэдэнтнае развіццё. На сучасным этапе ўзнікла неабходнасць падрыхтоўкі журналістаў у галіне інтэрнэт-медыя. Дысцыпліна “Мова і стыль інтэрнэт-выданняў” увайшла ў вучэбныя планы Інстытута журналістыкі Беларускага дзяржаўнага ўніверсітэта. Курс разлічаны на студэнтаў, якія набываюць прафесійныя якасці работніка вэб-газеты ці вэб-часопіса. Таму асноўная ўвага ў змесце спецкурса надаецца праблемам мовы і стылю інтэрнэт-выданняў, вызначэнню лінгвістычнай прыроды розных жанраў інтэрнэт-журналістыкі на сучасным этапе. Мэтай курса “Мова і стыль інтэрнэт-выданняў” з’яўляецца апісане і тлумачэнне асаблівасцей функцыянавання мовы ў інтэрнэце з улікам складанага ўзаемадзеяння некаторага адкрытага мноства фактараў пры пачатковай уключанасці чалавека ў сацыяльна-культурны аспект узаемадзеяння ў сеціве.