На шчодрай ніве еўрапейскай славяншчыны (з нагоды выхаду зборніка навуковых прац да 70-годдзя прафесара Герда Генчэля)

Abstract

Летам 2023 г. шаноўны прафесар адзначыў свой 70-гадовы юбілей. Вучні і калегі навукоўца з Альдэнбургскага ўніверсітэта імя Карла фон Асецкі прафесары Г. Бартэльс, Т. Менцэль і Я. П. Цэлер адзначылі гэту дату падрыхтоўкай і выданнем у «строга таемнай» абстаноўцы саліднага тома навуковых прац сяброў і калег юбіляра з розных еўрапейскіх краін. Суаўтарамі кнігі сталі 35 навукоўцаў з Аўстрыі, Беларусі, Бельгіі, Германіі, Нарвегіі, Польшчы, Расіі, Украіны, Швейцарыі. Нягледзячы на тое што ў кожнага даследчыка асновай артыкула сталі папярэднія назіранні або вынікі даследавання па канкрэтнай індывідуальна-аўтарскай тэматыцы, пераважная большасць тэкстаў прама або ўскосна тычылася шматлікіх міжнародных праектаў, што ажыццяўляліся пад кіраўніцтвам прафесара Г. Генчэля.