Сусветная літаратура ў мультыкультурным кантэксце : справаздача аб навукова--даследчай рабоце (заключная) / БДУ ; навуковы кіраўнік Г. М. Бутырчык

Abstract

Мэта – выяўленне спецыфікі мультыкультурнай/посткаланіяльнай парадыгмы сусветнай літаратуры, спосабаў яе мастацкай рэпрэзентацыi на ўзроўнях праблемна-тэматычнага поля, сацыякультурнага кантэксту, жанравай спецыфікi i наратыўных стратэгiй. Аб’ект – сусветная літаратура ў сукупнасці яе нацыянальных варыянтаў. Метады даследавання: параўнальна-гістарычны, герменеўтычны, структуралісцкі, постструктуралісцкі, структурна-семіятычны, рэцэптыўны, гендарны, нараталагічны. Даследаваны феномены мультыкультуралізму, спецыфіка функцыянавання літаратуры ў мулькультурным кантэксце; раскрыты спосабы і формы мастацкага ўвасаблення нацыянальнай/гібрыднай/асобаснай/гендарнай ідэнтычнасцяў; выяўлена аўтарская спецыфіка рэалізацыі катэгорыі іншасці на гендарным, гібрыдным і іншых узроўнях мастацкага тэксту. У выніку даследавання літаратурнага працэсу ў мультыкультурнай парадыгме ў значнай ступені пашыраны традыцыйны кантэкст замежнай літаратуры за кошт актыўнага асваення літаратур, якія раней заставаліся на перыферыі даследавання сусветнага мастацтва слова; праз шматбаковы аналіз форм мастацкай рэпрэзентацыі ідэнтычнасці, апазіцый «я – іншы», «свой – чужы» абгрунтавана неабходнасць нацыянальнай дыферэнцыяцыі літаратур, створаных на адной мове альбо ў адным рэгіёне, актуалізавана праблема атрыбуцыі полімоўнай (лацінская, польская, ідыш, руская, татарская, украінская) літаратуры Беларусі; распрацаваны адпаведныя літаратуразнаўчыя парадыгмы, прыдатныя не толькі для вывучэння творчасці замежных пісьменнікаў у шырокім мультыкультурным кантэксце, але і для шматаспектнага разгляду полімоўнай беларускай літаратуры ў сістэме сусветнай культуры як унікальнага ідэйна-эстэтычнага феномена. Вынікі адлюстраваныя ў 159 публікацыях, укаранёныя ў вучэбны працэс.